മുനമ്പത്ത് ഉള്ളത് വഖഫ് ഭൂമി തന്നെ; നിലപാടിൽ ഉറച്ച് കെ എം ഷാജി
കാസർകോട്: മുനമ്പത്ത് ഉള്ളത് വഖഫ് ഭൂമിയാണെന്ന കെഎം ഷാജിയുടെ നിലപാടിനെതിരെ മുസ്ലിം നേതാവ് പികെ കുഞ്ഞാലിക്കുട്ടി കഴിഞ്ഞദിവസം രംഗത്ത് വന്നിരുന്നു. എന്നാൽ കുഞ്ഞാലിക്കുട്ടിയുടെ നിലപാട് തള്ളി മുസ്ലിം ലീഗ് സംസ്ഥാന സെക്രട്ടറി കെ എം ഷാജി വീണ്ടും രംഗത്ത് വന്നിരിക്കുകയാണ് . മുനമ്പം വഖഫ് ഭൂമിയാണെന്ന് കെഎം ഷാജി ആവർത്തിച്ചു . സാദിഖലി തങ്ങള്‍ വിഷയത്തില്‍ ഇടപെട്ടത് അത് വഖ്ഫ് ഭൂമിയായതു കൊണ്ടാണ് ഷാജി പറഞ്ഞു.
ഏതെങ്കിലും നാട്ടിൽ കുറേ ആളുകൾ സ്ഥലം വാങ്ങിയ രേഖകളിൽ പ്രശ്നങ്ങളുണ്ടെന്ന് കരുതി അത് പരിഹരിക്കാൻ സാദിഖലി തങ്ങൾ പോകുമോ? മുൻ എംഎൽഎ കൂടിയായ കെഎം ഷാജി പറഞ്ഞു.
മുനമ്പത്തെ ഭൂമി വഖഫ് ഭൂമി അല്ലെന്ന പ്രതിപക്ഷ നേതാവ് വിഡി സതീശന്‍റെ നിലപാടിനോട് പ്രതികരിക്കാനില്ലെന്നും ലീഗിന്‍റെ നിലപാട് സാദിഖലി തങ്ങള്‍ വ്യക്തമാക്കിയിട്ടുണ്ടെന്നും മറ്റാരും പാർട്ടിയാകാൻ നോക്കേണ്ടെന്നും കുഞ്ഞാലിക്കുട്ടി പറഞ്ഞിരുന്നു. ഇതിന് പിന്നാലെയാണ് ഷാജി തന്‍റെ മുൻനിലപാട് ആവർത്തിച്ചിരിക്കുന്നത്.
മുനമ്പം വിഷയത്തില്‍ ഇന്നലെ പ്രതിപക്ഷ നേതാവ് വി ഡി സതീശന്‍റെ നിലപാടിനെതിരെ ഷാജി രംഗത്തെത്തിയിരുന്നു. മുനമ്പത്തെ ഭൂമി വഖഫ് ഭൂമി അല്ലെന്ന് പറയാനാകില്ലെന്നും വിഷയത്തില്‍ പ്രതിപക്ഷ നേതാവിന്‍റെ അഭിപ്രായമല്ല മുസ്ലിം ലീഗിനെന്നുമായിരുന്നു ഷാജിയുടെ പ്രസ്താവന.
