വയനാട്ടിൽ കടുവ വീണ്ടും ആടിനെ കൊന്നു ; കടുവയെ കണ്ടെന്ന് നാട്ടുകാർ
വയനാട്: അമരക്കുനിയിൽ ഇറങ്ങിയ കടുവയെ ഇതുവരെ പിടികൂടാനായില്ല. ഇന്നലെ രാത്രി മുഴുവൻ നടത്തിയ തെരച്ചിലിലും കടുവയെ കണ്ടെത്താനായില്ല . അതിനിടെ കടുവ വീണ്ടും ഒരു ആടിനെ കൂടി കൊന്നിരിക്കുകയാണ്. നിലവിൽ കടുവ കൊന്ന ആടുകളുടെ എണ്ണം 5 ആയി. ഇന്നലെ തൂപ്രയിൽ ചന്ദ്രന്റെ ആടിനെയാണ് പിടികൂടിയത്. രാത്രിയുടനീളം കടുവയ്ക്ക് പിറകെ ആർ ആർ ടിയും വെറ്ററിനറി ടീമും തെരച്ചിൽ നടത്തി.
ആടിനെ കൊന്നത് പിന്നാലെ 2 തവണ കൂടി കടുവ വന്നു എന്ന് ആടിന്റെ ഉടമ ചന്ദ്രൻ പറഞ്ഞു. പുലർച്ചെ 4 മണിക്കാണ് വീണ്ടും കടുവ വന്നത്. ആടിനെ വലിക്കാൻ നോക്കിയെങ്കിലും ജഡം കെട്ടി ഇട്ടതിനാൽ കടുവയ്ക്ക് കൊണ്ടുപോകാൻ കഴിഞ്ഞില്ലെന്നും ചന്ദ്രന്‍ പറഞ്ഞു. മടങ്ങിയ കടുവ 10 മിനിറ്റിന് ശേഷം വീണ്ടും വന്നു. മയക്കുവെടിക്ക് ഒരുങ്ങുമ്പോൾ കടുവ മടങ്ങി എന്നും ചന്ദ്രൻ കൂട്ടിച്ചേര്‍ത്തു.
