ഐപിഎല് 2026 മിനി താര ലേലത്തിന് മുമ്പ് സഞ്ജു സാംസണിനെ ട്രേഡ് ചെയ്യാന് താരത്തിന്റെ പഴയ ഐപിഎല് ടീം രംഗത്ത്.
ഐപിഎല് 2026ന് മുന്നോടിയായുള്ള താര ലേലം ഡിസംബറില് നടക്കാനിരിക്കെ ഫ്രാഞ്ചൈസികള് കരുനീക്കങ്ങള് തുടങ്ങി. ടീമുകള് നിലനിര്ത്തുന്ന താരങ്ങളുടെ പട്ടിക സമര്പ്പിക്കേണ്ട അവസാന തീയ്യതി നവംബര് 15 ആയിരിക്കുമെന്നതിനാല് പ്ലെയര് ട്രേഡ് വഴിയുള്ള ട്രാന്സ്ഫറിന് ഇനി കുറച്ച് ദിവസങ്ങള് മാത്രം. ലേലത്തിന് മുമ്പ് സഞ്ജുവിനെ വാങ്ങാന് അദ്ദേഹത്തിന്റെ പഴയ ഫ്രാഞ്ചൈസിയായ ഡല്ഹി ക്യാപിറ്റല്സ് രംഗത്തെത്തിയതായാണ് പുതിയ റിപോര്ട്ട്. പകരം ഡിസി വിട്ട് നല്കേണ്ട താരം, തുക ഉള്പ്പെടെയുള്ള കാര്യങ്ങളില് അന്തിമ ധാരണയിലെത്തേണ്ടതുണ്ട്. മുമ്പ് സഞ്ജു ഡിസിക്ക് വേണ്ടി മികച്ച പ്രകടനം കാഴ്ചവച്ചിട്ടുണ്ട്. സഞ്ജുവിന്റെ മൂന്ന് ഐപിഎല് സെഞ്ചുറികളിലൊന്ന് ഡിസിക്ക് വേണ്ടി ആയിരുന്നു.
രാജസ്ഥാന് റോയല്സും ചെന്നൈ സൂപ്പര് കിങ്സും വിലക്ക് നേരിട്ട സീസണുകളിലാണ് സഞ്ജു ഡിസിയുടെ താരമായിരുന്നത്. ഡിസിയില് നിന്ന് സീനിയര് വിക്കറ്റ് കീപ്പറും ഓപണിങ് ബാറ്ററുമായ കെഎല് രാഹുല് കൊല്ക്കത്ത നൈറ്റ് റൈഡേഴ്സിലേക്ക് മാറുകയാണെന്നും റിപോര്ട്ടുണ്ട്. ഈ ഒഴിവിലേക്ക് ക്യാപ്റ്റന്സി കൂടി ഏറ്റെടുക്കാന് കഴിവുള്ള സഞ്ജുവിനെ എത്തിക്കാനാണ് ശ്രമം.
സഞ്ജുവിനെ കൈമാറ്റം ചെയ്യാന് രാജസ്ഥാന് റോയല്സ് നേരത്തേ തന്നെ നീക്കങ്ങള് നടത്തിയെങ്കിലും ധാരണയിലെത്തിയിരുന്നില്ല. ചെന്നൈ സൂപ്പര് കിങ്സില് നിന്ന് പകരം ലഭിക്കേണ്ട താരങ്ങള് സംബന്ധിച്ച് തീരുമാനം എടുക്കാന് കഴിയാതെ വന്നതാണ് കാരണമെന്ന് റിപോര്ട്ടുകള് വന്നിരുന്നു. കെകെആറും സഞ്ജുവിനായി ശ്രമിക്കുന്നുണ്ടായിരുന്നു. കെഎല് രാഹുലിനെ ലഭിക്കുകയാണെങ്കില് കെകെആറിന് വിക്കറ്റ് കീപ്പര്, ഓപണിങ് ബാറ്റര്, ക്യാപ്റ്റന് റോളുകളിലേക്ക് അദ്ദേഹത്തെ നിയോഗിക്കാനാവും.
തുടരാന് താല്പര്യമില്ലെന്നും ലേലത്തിലൂടെയോ ട്രേഡിലൂടെയോ വിട്ടയക്കണമെന്നും സഞ്ജു ആവശ്യപ്പെട്ടതോടെയാണ് റോയല്സ് ഇതിനായുള്ള ശ്രമങ്ങള് തുടങ്ങിയത്. 2017 ഏപ്രില് 11ന് ആണ് സഞ്ജു ഡല്ഹി ഡെയര്ഡെവിള്സ് വേണ്ടി സെഞ്ചുറി നേടിയിരുന്നത്. റൈസിങ് പൂനെ സൂപ്പര് ജയന്റ്സിനെതിരായ ഈ മത്സരത്തില് ഡല്ഹി 97 റണ്സിന് വിജയിച്ചപ്പോള് സഞ്ജു കളിയിലെ താരമായി. ഐപിഎല്ലില് സഞ്ജു സെഞ്ചുറി നേടിയ മത്സരത്തില് ടീം വിജയിച്ചത് ഈ തവണ മാത്രമായിരുന്നു. 2019ല് ഹൈദരാബാദിനെതിരെ 55 പന്തില് പുറത്താകാതെ 102 റണ്സും 2021ല് പഞ്ചാബിനെതിരെ 63 പന്തില് 119 റണ്സും നേടിയെങ്കിലും സഞ്ജുവിന്റെ ടീം തോല്ക്കുകയാണുണ്ടായത്. ഡിസിയില് ചേരുകയാണെങ്കില് സഞ്ജുവിന്റെ ഹോം ഗ്രൗണ്ട് ഡല്ഹി ഫിറോസ് ഷാ കോട്ല മൈതാനം ആയിരിക്കും. കൊല്ക്കത്ത നൈറ്റ് റൈഡേഴ്സും സഞ്ജുവിനായി രംഗത്തുണ്ട്. കെകെആറിലെത്തിയാല് സഞ്ജുവിന് മികച്ച റെക്കോഡുള്ള കൊല്ക്കത്ത ഈഡന് ഗാര്ഡന്സ് ആയിരിക്കും ടീമിന്റെ തട്ടകം.
