സ്വർണ്ണവ്യാപാരികളെ കൊള്ളയടിച്ച സംഭവം; ഒരാൾ അറസ്റ്റിൽ
കൂത്തുപറമ്പ്: സ്വർണ വ്യാപാരികളെ നിർമലഗിരിയില്‍വെച്ച്‌ തട്ടിക്കൊണ്ടുപോയി പണം കവർന്ന സംഭവത്തില്‍ ഒരാള്‍ അറസ്റ്റില്‍. പുല്‍പള്ളി കല്ലേരിക്കരയിലെ സുജിത്തിനെ (29)യാണ് കൂത്തുപറമ്പ് ഇൻസ്‌പെക്ടർ കെ.വി. ഹരിക്കുട്ടനും സംഘവും മുത്തങ്ങയില്‍നിന്ന് അറസ്റ്റ് ചെയ്‌തത്. കുറ്റ്യാടി കേന്ദ്രീകരിച്ച്‌ പഴയ സ്വർണം വാങ്ങി വില്‍പന നടത്തുന്ന മഹാരാഷ്ട്ര സാംഗ്ളി സ്വദേശികളായ സന്തോഷ് മിശ്ര, അമല്‍ സാഗർ എന്നിവരാണ് കവർച്ചക്കിരയായത്.
ജൂലൈ 27ന് രാത്രിയായിരുന്നു കേസിനാസ്പദമായ സംഭവം. കാറില്‍ വരുകയായിരുന്ന വ്യാപാരികളെ പിന്തുടർന്നെത്തിയ കവർച്ചസംഘം നിർമലഗിരി വളവില്‍ എത്തിയപ്പോള്‍ കാർ തടഞ്ഞ് മറ്റൊരു കാറില്‍ കയറ്റി കൊണ്ടുപോവുകയായിരുന്നു. ഭീഷണിപ്പെടുത്തി പണം കവർന്ന ശേഷം വ്യാപാരികളെ വഴിയില്‍ ഇറക്കിവിട്ട് സംഘം രക്ഷപ്പെടുകയായിരുന്നു. 50 ലക്ഷം രൂപ കവർന്നെന്നാണ് വ്യാപാരികളുടെ പരാതി. എന്നാല്‍, പൊലീസ് നടത്തിയ അന്വേഷണത്തില്‍ മൂന്ന് കോടിയിലേറെ രൂപ നഷ്ടപ്പെട്ടതായാണ് വിവരം. പിടിയിലായ സുജിത്ത് നിരവധി കേസുകളില്‍ പ്രതിയാണ്. കൂത്തുപറമ്പ് മജിസ്ട്രേറ്റിന് മുൻപാകെ ഹാജരാക്കിയ പ്രതിയെ റിമാൻഡ് ചെയ്തു.
