കോഴിക്കോട്: ബീച്ച് റോഡിൽ പ്രമോഷൻ വീഡിയോ ചിത്രീകരണത്തിനിടെ അപകടത്തിൽ യുവാവ് മരിച്ച സംഭവം. യുവാവിനെ ഇടിച്ചത് ബെൻസ് കാറെന്ന് പൊലീസ് പറഞ്ഞു. എന്നാൽ ബെൻസ് കാറിന് ഇൻഷുറൻസ് ഇല്ലാതിരുന്നതിനാൽ പൊലീസിനെ തെറ്റിദ്ധരിപ്പിക്കാൻ ശ്രമം നടത്തി. ഇടിച്ചത് ഡിഫെൻഡർ കാർ എന്നാണ് ഇന്നലെ കസ്റ്റഡിയിലെടുത്ത രണ്ട് പേർ മൊഴി നൽകിയത്. റീൽസ് എടുത്ത മൊബൈൽ ഫോൺ ഹാജരാക്കാൻ ആവശ്യപ്പെട്ടിട്ടുണ്ടെന്നും. അപകടം വരുത്തിയ ബെൻസ് കാറിന്റെ ഡ്രൈവറെ ഉടൻ അറസ്റ്റ് ചെയ്യുമെന്നും. ആവശ്യമെങ്കിൽ കൂടുതൽ വകുപ്പുകൾ ചുമത്തുമെന്നും പൊലീസ് വ്യക്തമാക്കി.
ഇന്നലെ രാവിലെയാണ് പ്രമോഷന് വീഡിയോ ചിത്രീകരിക്കുന്നതിനിടെ വടകര കടമേരി സ്വദേശി ആൽവിൻ വാഹനമിടിച്ച് മരിച്ചത്. ആല്വിന് മുമ്പ് ജോലി ചെയ്തിരുന്ന 999 ഓട്ടോ മോട്ടീവ് എന്ന സ്ഥാപനത്തിന് വേണ്ടി പ്രമോഷണല് വീഡിയോ ചിത്രീകരിക്കുമ്പോഴാണ് അപകടമുണ്ടായത്.
കോഴിക്കോട് ബീച്ച് റോഡില് വെള്ളയില് പൊലീസ് സ്റ്റേഷന് സമീപത്ത് വെച്ച് രാവിലെ ഏഴരയോടെയാണ് സംഭവം.
ആഡംബര കാറുകള് ചേയ്സ് ചെയ്ത് വരുന്നതിന്റെ ദൃശ്യങ്ങള് റോഡിന്റെ നടുവില് നിന്ന് ആല്വിന് പകർത്തുകയായിരുന്നുവെന്ന് പൊലീസ് പറഞ്ഞു. ഇതിനിടെ നിയന്ത്രണം വിട്ട ഒരു കാര് ആല്വിനെ ഇടിക്കുകയായിരുന്നു. ഉടന് കാറിലുണ്ടായിരുന്നവർ തന്നെ ആല്വിനെ സ്വകാര്യ ആശുപത്രിയില് എത്തിച്ചെങ്കിലും ഉച്ചയോടെ മരണം സ്ഥിരീകരിക്കുകയായിരുന്നു. സ്വകാര്യ സ്ഥാപനത്തിന്റെ ഉടമയുടേയും ബന്ധുവിന്റേയും വാഹനമാണ് വീഡിയോ ചിത്രീകരിക്കാനായി ഉപയോഗിച്ചത്. രണ്ട് വാഹനങ്ങളും പൊലീസ് കസ്റ്റഡിയിലെടുത്തു. സംഭവത്തില് മനഃപൂര്വ്വമല്ലാത്ത നരഹത്യക്കാണ് പൊലീസ് കേസെടുത്തിരിക്കുന്നത്. വിദേശത്തായിരുന്ന ആല്വിന് ആരോഗ്യപ്രശ്നങ്ങളെ തുടര്ന്ന് അടുത്തിടെയാണ് നാട്ടിലെത്തിയത്. അതിനിടയിലാണ് ദാരുണാന്ത്യം സംഭവിച്ചത്.
