മുസ്ലിംകളെ വംശഹത്യ നടത്തികളയാമെന്നത്‌ വ്യാമോഹം മാത്രം- ടി. ആരിഫലി

കൊച്ചി: ഇന്ത്യയിലെ മുസ്ലിം സമുദായത്തെ വംശഹത്യ നടത്തി ഉന്മൂലനം ചെയ്ത്‌ കളയാമെന്നുള്ളത്‌ സംഘ്‌ പരിവാറിന്റെ കേവല ദിവാസ്വപ്നം മാത്രമാണെന്ന് ജമാ അത്തെ ഇസ്ലാമി ജനറൽ സെക്രട്ടറി ടി ആരിഫലി. ഈ രാജ്യത്തിൻ്റെ സാമൂഹിക രൂപികരണത്തിനും നവോത്ഥാനത്തിനും സ്വാതന്ത്ര്യസമരത്തിലുമെല്ലാം നിർണായക പങ്കുവഹിച്ചവരാണ് ഇന്ത്യൻ മുസ്ലിംകൾ.ഈ രാജ്യം മുസ്ലിംകളുടേത് കൂടിയാണ്. വിശ്വാസവും പോരാട്ടചരിത്രവും നിലനിൽക്കുന്നിടത്തോളം മുസ്ലിം ഉന്മൂലനവും അസാധ്യമാണെന്ന് അദ്ദേഹം കൂട്ടിച്ചേർത്തു.

"വിശ്വാസത്തിന്റെ അഭിമാന സാക്ഷ്യം വിമോചനത്തിന്റെ പാരമ്പര്യം" എന്ന തലകെട്ടിൽ സോളിഡാരിറ്റി യൂത്ത്‌ മൂവ്‌മന്റ്‌ സംഘടിപ്പിച്ച സംസ്ഥാന സമ്മേളനം ഉദ്ഘാടനം ചെയ്ത്‌ സംസാരിക്കുകയായിരുന്നു അദ്ധേഹം.

ലോകത്ത്‌ മതം പിന്തിരിപ്പനാണെന്ന് നിരന്തരം പറഞ്ഞ്‌ കൊണ്ടിരിക്കുമ്പോൾ ഇസ്ലാമിക വിശ്വാസം അഭിമാനമാണെന്നും വിമോചന പോരാട്ടങ്ങൾക്ക്‌ ഇസ്ലാം ഊർജ്ജം പകരുമെന്നും സോളിഡാരിറ്റി സംസ്ഥാന പ്രസിഡന്റ്‌ ഡോ.നഹാസ്‌ മാള പറഞ്ഞു. സംസ്ഥാന പ്രതിനിധി സമ്മേളനത്തിൽ ഉദ്ഘാടന സെഷനിൽ അധ്യക്ഷത വഹിച്ച്‌ സംസാരിക്കുകയായിരുന്നു അദ്ധേഹം.

ആയിരകണക്കിന്‌ പ്രതിനിധികൾ സന്നിഹിതരായ പ്രതിനിധി സമ്മേളനത്തിൽ ജമാ അത്തെ ഇസ്ലാമി കേരള അമീർ എം.ഐ അബ്ദുൽ അസീസ്‌ മുഖ്യപ്രഭാഷണം നിർവ്വഹിച്ചു.

സോളിഡാരിറ്റി യൂത്ത്‌ മൂവ്‌മന്റ്‌ സംസ്ഥാന ജനറൽ സെക്രട്ടറി ജുമൈൽ പി.പി സ്വാഗതം പറഞ്ഞ ഉദ്ഘാടന സെഷൻ സംസ്ഥാന വൈസ്‌ പ്രസിഡന്റ്‌ സുഹൈബ്‌ സി.ടി സമാപന പ്രഭാഷണം നടത്തി.

തുടർന്ന് നടന്ന വ്യത്യസ്ഥ സെഷനുകളിൽ ആദിത്യ മേനോൻ (The Quint), മോങ് തെയ്ൻ ശ്വീ (Free Rohingya Coalition), റിജാഉൽ കരീം (President, AAMSU), ആസിഫ് മുജ്തബ (Founder, Miles 2 Smile), വലി റഹ്മാനി (Social Activeist, Public Speaker), സൽമാൻ അഹ്മദ് (പ്രസിഡൻ്റ്, എസ്.ഐ.ഒ ഇന്ത്യ), ശംസീർ ഇബ്റാഹീം (President, Fraternity Movement), ലബീദ് ശാഫി (പ്രസിഡൻ്റ്, സോളിഡാരിറ്റി കർണാടക), റാസിഖ് റഹീം (സാമൂഹിക പ്രവർത്തകൻ), അൻവർ സലാഹുദ്ദീൻ (ജന. സെക്രട്ടറി, സമർ അലി (ജി.ഐ ഒ സംസ്ഥാന സെക്രട്ടറി ), എസ്.ഐ.ഒ കേരള), ശഹീൻ അബ്ദുല്ല (Mektoob Media), ഷഫ്റിൻ (ആക്ടിംഗ് പ്രസിഡൻ്റ് ഫ്രറ്റേണിറ്റി കേരള, നിദ പർവീൻ (വിദ്യാർഥി ആക്ടിവിസ്റ്റ് ), ജമാഅത്തെ ഇസ്ലാമി ജനറൽ സെക്രട്ടറി വി.ടി അബ്ദുല്ലക്കോയ തങ്ങൾ, ജമാഅത്തെ ഇസ്ലാമി സെക്രട്ടറി യൂസുഫ് ഉമരി, ജമാഅത്തെ ഇസ്ലാമി മലപ്പുറം ജില്ല പ്രസിഡൻ്റ് സലീം മമ്പാട് എന്നിവർ വിവിധ വിഷങ്ങളവതരിപ്പിച്ചു.