മദ്യത്തിന് പുതിയ വില: ഇന്ന് മുതൽ പ്രാബല്യത്തിൽ; പിൻവലിക്കണമെന്ന് പ്രതിപക്ഷ നേതാവ്

തിരുവനന്തപുരം: മദ്യ വില വര്ധിപ്പിക്കാനുള്ള സര്ക്കാര് തീരുമാനം ദുരൂഹമെന്ന് പ്രതിപക്ഷ നേതാവ് വി ഡി സതീശന് പറഞ്ഞു. കമ്പനികള്ക്ക് കൊള്ളലാഭം ഉണ്ടാക്കുന്നതിനു വേണ്ടി 341 ബ്രാന്ഡുകളുടെ വിലയാണ് 10 രൂപ മുതല് 50 രൂപ വരെ വര്ധിപ്പിച്ചിരിക്കുന്നത്. വില വര്ധിപ്പിച്ച മദ്യത്തിന്റെ പട്ടികയില് മദ്യ നിര്മ്മാണ കമ്പനി സ്ഥാപിക്കാന് സര്ക്കാര് രഹസ്യമായി അനുമതി നല്കിയ ഒയാസിസ് കമ്പനിയുടെ വിവിധ ബ്രാന്ഡുകളും ഉള്പ്പെട്ടിട്ടുണ്ടെന്നും . മദ്യ നിര്മ്മാണ കമ്പനിക്ക് അനുമതി നല്കിയതിന് പിന്നാലെ മദ്യ കമ്പനികള്ക്കു വേണ്ടി വില വര്ധിപ്പിച്ചുള്ള സര്ക്കാര് തീരുമാനം സംശയകരമാണെന്നും വി ഡി സതീശന് വ്യക്തമാക്കി.
നേരത്തെ മദ്യ കമ്പനികള് ആവശ്യപ്പെട്ടത് അനുസരിച്ച് വിറ്റുവരവ് നികുതി സര്ക്കാര് ഒഴിവാക്കിക്കൊടുത്തിരുന്നുവെന്നും. അന്നും വില കൂട്ടിയാണ് നഷ്ടം നികത്തിയത്. എലപ്പുള്ളിയില് മദ്യ നിര്മ്മാണ കമ്പനിക്ക് അനുമതി നല്കിയത് പോലെ ഇപ്പോഴത്തെ തീരുമാനത്തിലും സുതാര്യതയില്ല. മദ്യവില കൂട്ടിയതുകൊണ്ട് ഉപഭോഗം കുറയില്ലെന്നതാണ് യാഥാര്ത്ഥ്യം. കുടുംബ ബജറ്റിലേക്കുള്ള വിഹിതത്തില് കുറവ് വരുന്നതിനാല് സ്ത്രീകളും കുട്ടികളുമാകും ഇതിന്റെ ഇരകളായി മാറുന്നതെന്നും വി ഡി സതീശന് ആരോപിച്ചു. മദ്യ ഉപഭോക്താക്കളെ ചൂഷണം ചെയ്ത് മദ്യകമ്പനികള്ക്ക് ലഭം ഉണ്ടാക്കിക്കൊടുക്കാന് സര്ക്കാര് കൂട്ടു നില്ക്കുന്നത് അംഗീകരിക്കാനാകില്ല. തീരുമാനം പിന്വലിക്കാന് സര്ക്കാര് തയാറാകണമെന്നും പ്രതിപക്ഷ നേതാവ് ആവശ്യപ്പെട്ടു.