റിലീസിന് മുന്‍പ് തീപ്പൊരി ഇടാന്‍ ടീം എമ്പുരാന്‍
ഖുറേഷി എബ്രഹാം എന്ന കഥാപാത്രമായി മോഹന്‍ലാല്‍ സ്‌ക്രീനില്‍ നിറഞ്ഞാടാന്‍ കാത്തിരിക്കുന്ന പ്രേക്ഷകര്‍ക്ക് മുന്നിലേക്ക് പുത്തന്‍ അപ്‌ഡേറ്റ് പങ്കിട്ടിരിക്കുകയാണ് സംവിധായകന്‍ പൃഥ്വിരാജ്. എമ്പുരാനിലെ കഥാപാത്രങ്ങളെ പരിചയപ്പെടുത്തി കൊണ്ടുള്ള വീഡിയോ അപ്‌ഡേറ്റ് റിലീസ് ചെയ്യുന്നു എന്നതാണ് വിവരം. 36 കഥാപാത്രങ്ങളെ പതിനെട്ട് ദിവസം കൊണ്ട് പ്രേക്ഷകര്‍ക്ക് പരിചയപ്പെടുത്തും. ഈ കഥാപാത്രങ്ങള്‍ ചെയ്ത താരങ്ങളുടെ എക്‌സ്പീരിയന്‍സും അപ്‌ഡേറ്റില്‍ ഉണ്ടാകും. നാളെ മുതല്‍ രാവിലെ 10നും വൈകിട്ട് 6 മണിക്കും ആകും അപ്‌ഡേറ്റ് റിലീസ് ചെയ്യുക. പതിനെട്ട് ദിവസം വരെ നീണ്ടുനില്‍ക്കും. എമ്പുരാന്‍ കാണാന്‍ കാത്തിരിക്കുന്നവര്‍ക്ക് മുന്നിലേക്ക് വലിയൊരു തീപ്പൊരിക്കാണ് ഈ അപ്‌ഡേറ്റ് തിരി കൊളുത്തുക എന്നാണ് ആരാധക പ്രതീക്ഷകള്‍.
ഏറെ നാളത്തെ കാത്തിരിപ്പുകള്‍ക്ക് ഒടുവില്‍ മാര്‍ച്ച 27ന് എമ്പുരാന്‍ റിലീസ് ചെയ്യും. പാന്‍ ഇന്ത്യന്‍ റിലീസായി എത്തുന്ന ചിത്രത്തില്‍ ലൂസിഫറില്‍ ഉണ്ടായിരുന്ന ഏതാനും ചില അഭിനേതാക്കളും ഉണ്ടാകും. ആശീര്‍വാദ് സിനിമാസിനൊപ്പം ലൈക്ക പ്രൊഡക്ഷന്‍സും ചേര്‍ന്നാണ് ചിത്രം നിര്‍മ്മിക്കുന്നത്. സ്റ്റീഫന്‍ നെടുമ്പള്ളി, എബ്രാം ഖുറേഷി എന്നീ രണ്ട് മോഹന്‍ലാല്‍ കഥാപാത്രത്തെ ചിത്രത്തില്‍ കാണാനാകുമെന്നാണ് കരുതപെടുന്നത്. 2019ല്‍ ആയിരുന്നു പൃഥ്വിരാജ് ആദ്യമായി സംവിധാനം ചെയ്ത ലൂസിഫര്‍ റിലീസ് ചെയ്തത്. വന്‍ സ്വീകാര്യത നേടിയ ചിത്രം പൃഥ്വിരാജ് സുകുമാരന്‍, വിവേക് ഒബ്‌റോയ്, മഞ്ജു വാര്യര്‍, ടൊവിനോ തോമസ്, ഇന്ദ്രജിത്ത് സുകുമാരന്‍ തുടങ്ങി ഒട്ടനവധി താരങ്ങള്‍ അണിനിരന്നിരുന്നു.
