തമിഴ്നാട്: തൂത്തുക്കുടിയില് കാണാതായ അഞ്ചുവയസുകാരൻ അയല്വീട്ടിലെ ടെറസിന് മുകളില് മരിച്ച നിലയില്. കോവില്പ്പെട്ടി സ്വദേശി കറുപ്പുസ്വാമിയാണ് മരിച്ചത്. കുട്ടിയുടെ സ്വര്ണാഭരണങ്ങള് മോഷ്ടിക്കപ്പെട്ടിരുന്നു.
ഇന്നലെ ഉച്ചയോടെ സഹോദരനും മറ്റ് കൂട്ടുകാര്ക്കുമൊപ്പം കളിക്കുന്നതിനിടെയാണ് കുട്ടിയെ കാണാതായത്. അസുഖം കാരണം 10 ദിവസമായി കുട്ടി സ്കൂളില് പോയിരുന്നില്ല. ഇന്നലെ വൈകീട്ട് കുട്ടിയുടെ മാതാപിതാക്കള് കൂലിപ്പണി കഴിഞ്ഞ് തിരികെ വന്നപ്പോഴാണ് കറുപ്പുസ്വാമിയെ കാണാനില്ലെന്ന കാര്യം മനസിലായത്. ഉടന് തന്നെ വീട്ടുകാരും അയല്ക്കാരും ചേര്ന്ന് എല്ലായിടത്തും തെരഞ്ഞു. പിന്നീടാണ് ഇന്നലെ അര്ധരാത്രിയ്ക്കും പുലര്ച്ചെയ്ക്കും ഇടയിൽ കുട്ടിയുടെ മൃതദേഹം അയല്വീട്ടിലെ ടെറസില് നിന്ന് കണ്ടെത്തിയത്.
കുട്ടിയെ ശ്വാസംമുട്ടിച്ചുകൊലപ്പെടുത്തിയെന്നാണ് പൊലീസിന്റെ പ്രാഥമിക നിഗമനം. ആഭരണങ്ങള് തട്ടിയെടുക്കാനുള്ള ശ്രമത്തിനിടെ കുട്ടിയെ കൊലപ്പെടുത്തിയതാകാമെന്നാണ് പൊലീസ് പറയുന്നത്. സംഭവത്തിൽ പ്രതികള്ക്കായി പൊലീസ് അന്വേഷണം ആരംഭിച്ചു.
