ഗുളിക കഴിക്കാന്‍ എത്ര ഗ്ലാസ്സ് വെളളം എടുക്കണം?
ഗുളിക കഴിക്കാന്‍ വെള്ളം എന്തിന്??
ചിലര്‍ ഗുളിക വെറുതേ വിഴുങ്ങുന്നത് കാണാം. ചിലര്‍ വെറും കുറച്ച് വെള്ളം കൊണ്ട് ഗുളിക കഴിക്കും. സത്യത്തില്‍ ഗുളിക കഴിക്കാന്‍ വെള്ളം ഉപയോഗിക്കണം. കാരണം, വെള്ളവും ഗുളികയുടെ കൂടെ എത്തിയാല്‍ മാത്രമാണ് ഗുളിക വേഗത്തില്‍ അലിഞ്ഞ് ശരീരത്തിലേയ്ക്ക് അത് പ്രവര്‍ത്തിച്ച് തുടങ്ങുകയും നിങ്ങള്‍ക്ക് അതിന്റെ ഗുണം ലഭിക്കുകയും ചെയ്യുക.
എത്ര ഗ്ലാസ്സ് വെള്ളം കുടിക്കണം?
ഓരോ ഗുളികകള്‍ അനുസരിച്ചാണ് നിങ്ങള്‍ കുടിക്കേണ്ട വെള്ളത്തിന്റെ അളവും തീരുമാനിക്കേണ്ടത്. ചിലത് നല്ലപോലെ ഡോസ് കൂടിയ ഗുളികളായിരിക്കും. ഇവ കഴിക്കുമ്പോള്‍ നല്ലപോലെ വെള്ളം കുടിക്കാന്‍ ശ്രദ്ധിക്കണം. കുറഞ്ഞത് ഒരു ഗ്ലാസ്സിന് മുകളില്‍ വെള്ളം കുടിക്കുന്നത് നല്ലതാണ്. കൂടാതെ, ചിലര്‍ വെള്ളം കുടിക്കാതെ തന്നെ ഗുളിക കഴിക്കുന്നത് കാണാം. ഇത് വയറ്റില്‍ അസിഡിറ്റി പ്രശ്നങ്ങള്‍ വരാനും അള്‍സര്‍ പോലെയുള്ള അസുഖങ്ങള്‍ വരാനും സാധ്യത കൂടുതലാണ്. അതുപോലെ തന്നെ, നിങ്ങളുടെ അസുഖത്തിന്റെ അവസ്ഥയും ഗുളികയും ഏതാണ് എന്നതിനനുസരിച്ചാണ് വെള്ളത്തിന്റെ അളവും നിശ്ചയിക്കേണ്ടത്. ഇതിനായി നിങ്ങള്‍ക്ക് മരുന്നിന്റെ ലേബല്‍ വായിച്ച് നോക്കാം. ഇല്ലെങ്കില്‍ ഡോക്ടറോട് ചോദിക്കാവുന്നതാണ്.
ശ്രദ്ധിക്കേണ്ട കാര്യം?
മരുന്ന് കഴിക്കാന്‍ തിരഞ്ഞെടുക്കുമ്പോള്‍ എല്ലായ്പ്പോഴും സാധാ വെള്ളം എടുക്കുന്നതാണ് നല്ലത്. അല്ലെങ്കില്‍ നിങ്ങള്‍ക്ക് ചെറുചൂടുവെള്ളം എടുക്കാവുന്നതാണ്. ചെറു ചൂടുവെള്ളത്തില്‍ മരുന്ന് കഴിച്ചാല്‍ ഗുളിക വേഗത്തില്‍ അലിയാനും വേഗത്തില്‍ തന്നെ ഫലം ലഭിക്കാനും സഹായിക്കുന്നതാണ്. അതുപോലെ വെള്ളത്തിന്റെ ചൂടെ അമിതമാകാതിരിക്കാന്‍ ശ്രദ്ധിക്കേണ്ടത് അനിവാര്യമാണ്. അതുപോലെ തന്നെ അമിതമായി തണുപ്പുള്ള വെള്ളം കുടിക്കുന്നതും അത്ര നല്ലതല്ല.
ചിലര്‍ ഗുളിക കഴിച്ച് കഴിഞ്ഞ് അപ്പോള്‍ തന്നെ കിടക്കുന്നത് കാണാം. ഇത്തരത്തില്‍ കിടക്കുന്നത് ഗുളിക അലിഞ്ഞ് പ്രവര്‍ത്തനം സാവധാനത്തിലാകുന്നതിന് കാരണമാകുന്നു.അതിനാല്‍ ഗുളിക കഴിച്ച് കഴിഞ്ഞ് ഒരു അര മണിക്കൂര്‍ കഴിഞ്ഞ് മാത്രം കിടക്കാന്‍ ശ്രദ്ധിക്കുക. ഇത്തരത്തില്‍ ചെയ്താല്‍ നിങ്ങള്‍ക്ക് വേഗത്തില്‍ തന്നെ ഗുളികയുടെ ഗുണം ലഭിക്കാന്‍ സഹായിക്കും.
ചിലര്‍ പാല്‍, അല്ലെങ്കില്‍ ജ്യൂസ് എന്നിവയുടെ കൂടെ ഗുളിക കഴിക്കുന്നത് കാണാം. ഇത്തരത്തില്‍ കഴിച്ചാല്‍ ഗുളിക ലയിച്ച് ചേരാനുള്ള സമയം കൂടുന്നതിന് ഇത് കാരണമാകുന്നു. ഇത്തരത്തില്‍ നിങ്ങള്‍ കഴിക്കാറുണ്ടെങ്കില്‍ അത് ഡോക്ടറോട് പറയേണ്ടത് അനിവാര്യമാണ്. അതുപോലെ തന്നെ, ആഹാരം കഴിച്ച് കഴിഞ്ഞ് കഴിക്കേണ്ട മരുന്നുകള്‍ ആഹാരം കഴിച്ച് അര മണിക്കൂറിനുള്ളില്‍ കഴിക്കുക. അതുപോലെ, ആഹാരത്തിന് മുന്‍പ് കഴിക്കേണ്ടവ, ആഹാരം കഴിക്കാന്‍ അര മണിക്കൂര്‍ മുന്‍പേ കഴിക്കാം.
ഗുളിക വാങ്ങുമ്പോള്‍?
പലരും അസുഖം വന്നാല്‍ സ്വയം ചികിത്സിക്കുന്നത് കാണാം. ഈ പ്രവണത നല്ലതല്ല. ഡോക്ടറെ കണ്ട് തന്നെ മരുന്ന് വാങ്ങിക്കാന്‍ ശ്രദ്ധിക്കുക. ഇല്ലെങ്കില്‍ ഇത് നിരവധി ആരോഗ്യ പ്രശ്നങ്ങള്‍ക്ക് കാരണമാണ്. അതുപോലെ, മരുന്നുകള്‍ കഴിക്കുമ്പോള്‍ അവയുടെ പാര്‍ശ്യഫലങ്ങള്‍ അധികം ബാധിക്കാതിരിക്കാന്‍ നല്ലപോലെ വെള്ളം കുടിക്കണം. ഗുളിക കഴിക്കുമ്പോള്‍ മാത്രമല്ല, മറ്റേത് മരുന്ന് കഴിക്കുമ്പോഴും നല്ലപോലെ വെള്ളം കുടിക്കേണ്ടത് അനിവാര്യമാണ്. എന്നാല്‍ മാത്രമാണ് ഗുണം ലഭിക്കുക.
