തിരുവനന്തപുരം:കിഴക്ക് പടിഞ്ഞാറന്‍ കാറ്റിന്റെ സംയോജനംമൂലം ഇന്നും നാളെയും എല്ലാ ജില്ലകളിലും ശക്തമായ ഇടിയും മിന്നലും കാറ്റോടും കൂടിയ മഴക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ്. ഉച്ചക്ക് ശേഷം തുടക്കത്തില്‍ കിഴക്കന്‍ മേഖല കേന്ദ്രീകരിച്ചു തുടങ്ങി,തുടര്‍ന്ന് ഇടനാട് തീരദേശങ്ങളിലേക്ക് മഴ നീങ്ങാന്‍ സാധ്യതയുണ്ട്. ഇടിമിന്നലിന് സാധ്യതയുള്ളതിനാല്‍ ജാഗ്രത പാലിക്കണമെന്നും കാലാവസ്ഥാ വകുപ്പ് അറിയിച്ചു.
തിരുവനന്തപുരം, പത്തനംതിട്ട, എറണാകുളം, തൃശൂര്‍, പാലക്കാട്, മലപ്പുറം, വയനാട് ജില്ലകളില്‍ ഇന്ന് യെല്ലോ അലര്‍ട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് ഈ ജില്ലകളില്‍ പ്രവചിക്കപ്പെട്ടിരിക്കുന്നത്. നാളെ മലപ്പുറം, വയനാട് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
വൈകുന്നേരം രാത്രിയോടെ മധ്യ തെക്കന്‍ കേരളത്തില്‍ കൂടുതല്‍ പ്രദേശങ്ങങ്ങളിലും വടക്കന്‍ കേരളത്തില്‍ മലയോര മേഖലയിയിലും ശക്തമായ ഇടിമിന്നലോടെ മഴക്ക് സാധ്യതയുണ്ട്. മണിക്കൂറില്‍ 50 കിമി വരെ വേഗതയില്‍ വീശുന്ന കാറ്റിനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. തെക്കന്‍ ജില്ലകളില്‍ പൊതുവെ മേഘാവൃതമാണെങ്കിലും വടക്കന്‍ ജില്ലകളില്‍ ഉയര്‍ന്ന ചൂട് അനുഭവപ്പെടുന്നുണ്ട്.
