ശബരിമല തീര്ഥാടകര് സഞ്ചരിച്ച കാര് നിയന്ത്രണം വിട്ട് അപകടം; അഞ്ച് പേര്ക്ക് പരിക്ക്
കോഴിക്കോട്: കര്ണാടകയില് നിന്നുള്ള ശബരിമല തീര്ഥാടകര് സഞ്ചരിച്ച കാര് നിയന്ത്രണം വിട്ട് തെങ്ങില് ഇടിച്ച് അപകടം. അഞ്ച് പേര്ക്ക് പരിക്കേറ്റു. ഇന്ന് പുലര്ച്ചെ 2.30ഓടെ കോഴിക്കോട് തിരുവമ്പാടി-കോടഞ്ചേരി പാതയില് തമ്പലമണ്ണയിലെ പെട്രോള് പമ്പിന് സമീപത്തായാണ് സംഭവം. പരിക്കേറ്റവരില് രണ്ട് പേരുടെ പരിക്ക് ഗുരുതരമാണെന്നാണ് ലഭിക്കുന്ന വിവരം. നിയന്ത്രണം വിട്ട കാര് തെന്നിമാറി സമീപത്തെ പറമ്പിലേക്ക് കയറുകയും ഇവിടെയുണ്ടായിരുന്ന തെങ്ങില് ഇടിച്ച് നില്ക്കുകയായിരുന്നു. പരിക്കേറ്റവരെ ഉടന് തന്നെ മുക്കത്തെ സ്വകാര്യ ആശുപത്രിയില് പ്രവേശിപ്പിക്കുകയും ചെയ്തു. ഡ്രൈവര് ഉറങ്ങിപ്പോയതാണ് അപകടത്തിന് കാരണമെന്നാണ് ലഭിക്കുന്ന വിവരം.
