തൃശ്ശൂരില്‍ ബൈക്കും ലോറിയും കൂട്ടിയിടിച്ച് അപകടം
തൃശ്ശൂര്‍: പെരിങ്ങോട്ടുകരയില്‍ ബൈക്കും ലോറിയും കൂട്ടിയിടിച്ച് ദമ്പതികള്‍ക്ക് പരിക്കേറ്റു. മുറ്റിച്ചൂര്‍ സ്വദേശികളായ അണ്ടേഴത്ത് വീട്ടില്‍ ശിവശങ്കരന്‍, ഷീല എന്നിവര്‍ക്കാണ് പരിക്കറ്റത്. ഇന്ന് രാവിലെ 6.40 ന് പെരിങ്ങോട്ടുകര നാലും കൂടിയ സെന്ററില്‍ വെച്ച് ബൈക്കും ലോറിയും നേര്‍ക്കുനേര്‍ ഇടിക്കുകയായിരുന്നു. ബൈക്ക് ലോറിക്കടിയില്‍ കുരുങ്ങിയ നിലയിലാണ്. ഭാര്യയും ഭര്‍ത്താവും മുറ്റിചൂരിലേക്ക് പോകുകയായിരുന്നു. ചരക്കുമായി വന്ന തമിഴ്‌നാട് രജിസ്‌ട്രേഷനിലുള്ള ലോറിയുമായാണ് ബൈക്ക് ഇടിച്ചത്. ലോറി അന്തിക്കാട് പൊലീസ് കസ്റ്റഡിയിലെടുത്തു. ഗുരുതരമായി പരിക്കേറ്റ ദമ്പതികളെ കൂര്‍ക്കഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
