കോഴിക്കോട്: പൂച്ചയെ രക്ഷിക്കാനായി പെട്ടെന്ന് ബ്രേക്കിട്ടതിനെ തുടര്‍ന്ന് ഓട്ടോ മറിഞ്ഞ് അപകടം. മൂന്ന് പേര്‍ക്ക് പരിക്കേറ്റു. കോഴിക്കോട് അത്തോളിയിലാണ് കഴിഞ്ഞ ദിവസം രാവിലെ അപകടമുണ്ടായിരിക്കുന്നത്. ഓട്ടോ ഓടിച്ചിരുന്ന യുവതിയുള്‍പ്പെടെ മൂന്ന് പേര്‍ക്കാണ് പരിക്കേറ്റിരിക്കുന്നത്. ഇവരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്നാണ് ലഭിക്കുന്ന വിവരം. ഒരാളെ പ്രാഥമിക ചികിത്സ നല്‍കി മടക്കിയയച്ചു.
തിരുവങ്ങൂരില്‍ നിന്ന് അത്തോളി ഭാഗത്തേക്ക് പോവുകയായിരുന്ന ഓട്ടോയാണ് അപകടത്തില്‍പ്പെട്ടത്. ഓട്ടോയ്ക്ക് കാര്യമായ നാശനഷ്ടം സംഭവിച്ചു.
