ആശാ വര്‍ക്കര്‍മാരുടെ സമരം രാഷ്ട്രീയ പ്രേരിതം; സജി ചെറിയാന്‍
ആലപ്പുഴ:സെക്രട്ടറിയേറ്റിനു മുന്നിലെ ആശാ പ്രവര്‍ത്തകരുടെ സമരം രാഷ്ട്രീയ പ്രേരിതമെന്ന് മന്ത്രി സജി ചെറിയാന്‍. തെറ്റിദ്ധരിക്കപ്പെട്ട കുറച്ചു പേരാണ് സമരത്തിനു നേതൃത്വം കൊടുക്കുന്നത്. ഇവരാരും കേന്ദ്രത്തിനു മുന്നില്‍ പോയി സമരം ചെയ്യുകയോ, കേന്ദ്രത്തിനെതിരെ സംസാരിക്കാനോ തയാറാകുന്നില്ല. അതാണ് രാഷ്ട്രീയ ലക്ഷ്യമാണ് ഇതിനു പിന്നിലെന്നു പറയാന്‍ കാരണം. അത് മനസ്സിലാക്കാനുള്ള ബുദ്ധിയൊക്കെ ഇടതുപക്ഷ രാഷ്ട്രീയത്തിന് ഉണ്ട്. സഹോദരിമാര്‍ സമരത്തില്‍നിന്നു പിന്മാറണം. സര്‍ക്കാരിനു സാമ്പത്തിക ശേഷി വന്നു കഴിഞ്ഞാല്‍ ആദ്യം പരിഗണിക്കുക ആശാ പ്രവര്‍ത്തകരെയായിരിക്കും.” മന്ത്രി ഉറപ്പുനല്‍കി.
ആശമാര്‍ സമരത്തില്‍നിന്നു പിന്മാറണം, സര്‍ക്കാര്‍ ഒരു നിലപാട് സ്വീകരിച്ചിട്ടുണ്ട്. വസ്തുതാപരമായ കാര്യം സാമ്പത്തിക പ്രതിസന്ധി തന്നെയാണ്. എല്ലാവരുടെയും ആവശ്യങ്ങള്‍ സര്‍ക്കാരിന് ഇപ്പോള്‍ അംഗീകരിക്കാന്‍ കഴിയില്ല. നിശ്ചയിച്ച കാര്യങ്ങള്‍ കൃത്യമായി നല്‍കുകയാണ് ആദ്യ പരിഗണനയെന്നും മന്ത്രി പറഞ്ഞു.
‘
”ആശമാരെ കുത്തിയിളക്കി വിട്ട് സമരം ചെയ്യിപ്പിക്കുന്ന ഒരു ടീം ഉണ്ട്. കെ റെയില്‍ സമരത്തിനു പിന്നില്‍ അങ്ങനെ ഒരു ടീം ആയിരുന്നു. അന്ന് അത് പറഞ്ഞതിന് എന്റെ നേരെ തിരിഞ്ഞു. മാധ്യമങ്ങള്‍ ഇങ്ങനെ ഊതി പെരുപ്പിച്ചത് കൊണ്ട് ആശമാര്‍ക്ക് കാശ് കൊടുക്കാന്‍ ഉണ്ടാകുമോ? ആശമാരെ നയിക്കുന്ന സംഘടനയ്ക്ക് ഒപ്പം ആരും ഇല്ല. അവര്‍ നടത്തുന്ന സമരത്തെ വലതുപക്ഷ രാഷ്ട്രീയ പാര്‍ട്ടികള്‍ ഇടതു പക്ഷത്തെ അടിക്കാനുള്ള വടിയായി എടുത്ത് ഉപയോഗപ്പെടുത്തുന്നു. പാവപ്പെട്ട സ്ത്രീകള്‍ അത് വിശ്വസിക്കുന്നു. ഇക്കാര്യത്തില്‍ മുഖ്യമന്ത്രി പിണറായി വിജയന്‍ എന്തിനാണ് സംസാരിക്കുന്നത്, മുഖ്യമന്ത്രിയ്ക്ക് വേണ്ടി അല്ലെ ഞങ്ങള്‍ ഇങ്ങനെ പുലി പോലെ നില്‍ക്കുന്നത്.” – സജി ചെറിയാന്‍ പറഞ്ഞു.
