500 രൂപയെച്ചൊല്ലി തർക്കം ; അനുജനെ കുത്തിക്കൊലപ്പെടുത്തി യുവാവ്
മുംബൈ : 500 രൂപയെച്ചൊല്ലി തര്ക്കം. സ്വന്തം അനുജനെ കുത്തിക്കൊലപ്പെടുത്തി യുവാവ്. 32 വയസുകാരനായ യുവാവാണ് 27 വയസുകാരനായ അനുജനെ വെട്ടിക്കൊലപ്പെടുത്തിയിരിക്കുന്നത്. സംഭവ സമയം പ്രതി മദ്യലഹരിയിലായിരുന്നുവെന്ന് പൊലീസ് സ്ഥിരീകരിച്ചു. താനെയിലെ കല്യാൺ ഏരിയയിൽ ചൊവ്വാഴ്ച്ച രാത്രിയോടെയാണ് സംഭവം. സംഭവത്തിൽ പ്രതിയെ അറസ്റ്റ് ചെയ്തതായി പൊലീസ് പറഞ്ഞു.
മദ്യലഹരിയിലായിരുന്ന പ്രതി സലിം ഷമീമിന്റെ പോക്കറ്റില് നിന്ന് അനുജന് നസീം ഖാൻ അനുവാദം ചോദിക്കാതെ 500 രൂപയെടുത്തതാണ് കുറ്റകൃത്യത്തിലേക്ക് നയിച്ചതെന്ന് പൊലീസ് വ്യക്തമാക്കി. പ്രകോപിതനായ പ്രതിയും അനുജനും തമ്മില് ഏറെ നേരം വാക്കു തര്ക്കമുണ്ടായി. വാക്കു തര്ക്കം മൂര്ച്ഛിച്ചപ്പോള് അനുജനെ കത്തി കൊണ്ട് കുത്തുകയായിരുന്നുവെന്നും ബസാർപേത്ത് പോലീസ് സ്റ്റേഷനിലെ ഉദ്യോഗസ്ഥൻ പറഞ്ഞു.
കുറ്റകൃത്യം നടന്നതിനു ശേഷം ഇരുവരുടെയും അമ്മയാണ് പൊലീസിനെ വിവരമറിയിച്ചത്. അമ്മയുടെ മൊഴിയുടെ അടിസ്ഥാനത്തില് പ്രതിയെ അറസ്റ്റ് ചെയ്യുകയും ഭാരതീയ ന്യായ സംഹിത സെക്ഷൻ 103 (1) പ്രകാരം കൊലപാതകത്തിന് കേസെടുക്കുകയും ചെയ്തു. മൃതദേഹം പോസ്റ്റ്മോർട്ടത്തിനായി സർക്കാർ ആശുപത്രിയിലേക്ക് അയച്ചതായും കേസിൽ അന്വേഷണം പുരോഗമിക്കുകയാണെന്നും പൊലീസ് കൂട്ടിച്ചേർത്തു.
