കോഴിക്കോട്: സ്വകാര്യ ആശുപത്രിയില് ചികിത്സയില് കഴിയുന്ന കണ്ണൂര് തളിപ്പറമ്പ് സ്വദേശിയായ മൂന്നര വയസ്സുകാരന് അമീബിക് മസ്തിഷ്ക ജ്വരം സ്ഥിരീകരിച്ചു. പുതുച്ചേരിയിലെ ലാബില് നടത്തിയ പിസിആര് പരിശോധനയിലാണ് രോഗം സ്ഥിരീകരിച്ചത്. പരിയാരം മെഡിക്കല് കോളേജില് നടത്തിയ പ്രാഥമിക പരിശോധനയില് കുട്ടിക്ക് അമീബിക് മസ്തിഷ്ക ജ്വരം ബാധിച്ചതായി കണ്ടെത്തിയിരുന്നു. കുട്ടി ഇപ്പോള് വെന്റിലേറ്ററില് ചികിത്സയില് തുടരുകയാണ്. കുട്ടി മരുന്നുകളോട് പ്രതികരിക്കുന്നുണ്ടെന്നാണ് ഡോക്ടര്മാര് അറിയിക്കുന്നത്. കുളിക്കുമ്പോഴും മറ്റും മൂക്കിലെ നേര്ത്ത തൊലിയിലൂടെയാണ് അമീബ മനുഷ്യശരീരത്തില് കടക്കുന്നത്. രോഗം തലച്ചോറിനെയാണ് ഗുരുതരമായി ബാധിക്കുന്നത്, അതിനാല് മരണനിരക്ക് വളരെ കൂടുതലാണ്. രോഗാണു ശരീരത്തില് എത്തിയാല് രോഗലക്ഷണങ്ങള് പ്രകടിപ്പിക്കാന് ഒരാഴ്ചവരെ എടുക്കും എന്നതും വെല്ലുവിളിയാണ്. തലവേദന, പനി, ഛര്ദ്ദി എന്നിവയാണ് രോഗ ലക്ഷണങ്ങള്. അതേസമയം, രോഗം ഒരാളില് നിന്നും മറ്റൊരാളിലേക്ക് പകരില്ല എന്ന് വിദഗ്ധര് പറയുന്നു.
