തിരുവനന്തപുരം : ക്ഷേമ പെൻഷൻ തട്ടിപ്പ് നടത്തിയ സംഭവത്തിൽ 6 സർക്കാർ ജീവനക്കാരെ സസ്പെൻഡ് ചെയ്തു . മണ്ണ് സംരക്ഷണ വകുപ്പിലെ ജീവനക്കാർക്ക് എതിരെയാണ് നടപടി എടുത്തിരിക്കുന്നത്. പാർട്ട് ടൈം സ്വീപ്പർ മുതൽ വർക്ക് ഓഫീസർ വരെ നടപടി നേരിട്ടവരിൽ ഉൾപ്പെടും. അതോടൊപ്പം അനധികൃതമായി കൈപ്പറ്റിയ തുക 18% പലിശ സഹിതം തിരിച്ചു അടക്കാനും ധനവകുപ്പ് നിർദേശം നൽകി.
സംസ്ഥാനത്തെ ഗസറ്റഡ് ഉദ്യോഗസ്ഥൻ അടക്കം 1458 സർക്കാർ ജീവനക്കാർ സാമൂഹ്യസുരക്ഷാ പെൻഷൻ കൈപ്പറ്റുന്നുവെന്ന് പരിശോധനയിൽ കണ്ടെത്തി. ധന വകുപ്പ് നിർദേശ പ്രകാരം ഇൻഫർമേഷൻ കേരള മിഷൻ നടത്തിയ പരിശോധനയിലാണ് ഗുരുതര തട്ടിപ്പ് കണ്ടെത്തിയിരിക്കുന്നത്.
കോളേജ് അസിസ്റ്റന്റ് പ്രൊഫസർമാർ, ഹയർ സെക്കണ്ടറിയിലെ അടക്കം അധ്യാപകരും ക്ഷേമ പെൻഷൻ വാങ്ങുന്നവരുടെ പട്ടികയിലുണ്ട്. ആരോഗ്യ വകുപ്പിൽ 373 പേരാണ് ക്ഷേമ പെൻഷൻ വാങ്ങുന്നത്. പൊതുവിദ്യാഭ്യാസ വകുപ്പിൽ 224 പേരും. മാസാമാസം 23 ലക്ഷത്തിലേറെ രൂപയാണ് സര്ക്കാര് ഖജനാവില് നിന്നും തട്ടിപ്പുകാര് കൈക്കലാക്കിയിരിക്കുന്നത്. ഇത് ഒരു വര്ഷമാകുമ്പോള് രണ്ടേകാല് കോടി രൂപയാകും.
സാമൂഹ്യ സുരക്ഷാ പെന്ഷന് പട്ടിക കൈകാര്യം ചെയ്യുന്ന സേവന സോഫ്റ്റ്വെയറിലെ ആധാര് നമ്പര് സര്ക്കാര് ജീവനക്കാരുടെ ശമ്പള വിതരണത്തിനായുള്ള സ്പാര്ക്ക് സോഫ്റ്റ്വെയറിലും കണ്ടെത്തിയതോടെയാണ് പുറത്തായത്. തുടര്ന്ന് ഇന്ഫര്മേഷന് കേരള മിഷന് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങള് പുറത്തു വന്നത്.
