തെലങ്കാനയിൽ 86 മാവോയിസ്റ്റുകൾ പൊലീസിന്‌ മുന്നിൽ കീഴടങ്ങി
ഹൈദരാബാദ്‌: 86 മാവോയിസ്റ്റുകൾ തെലങ്കാന പൊലീസിന്‌ മുന്നിൽ കീഴടങ്ങിയതായി റിപ്പോർട്ട്‌. ഛത്തീസ്ഗഡ്‌ അതിർത്തിയിലെ ഭദ്രാദ്രി കൊതാഗുഡം ജില്ലയിൽ വച്ചാണ്‌ സപിഐ (മാവോയിസ്റ്റ്‌) അംഗങ്ങൾ പൊലീസിന്‌ മുന്നിൽ കീഴടങ്ങിയത്‌. കീഴടങ്ങിയവരിൽ നാല്‌ ഏരിയാ കമ്മിറ്റി അംഗങ്ങളും ഉൾപ്പെടും.
ഏരിയാ കമ്മിറ്റി അംഗങ്ങൾക്ക്‌ നാല്‌ ലക്ഷം രൂപ വീതം പാരിതോഷികം നൽകുമെന്ന്‌ ഭദ്രാദ്രി കൊതാഗുഡം എസ്‌പി രോഹിത്‌ രാജു പിടിഐയോട്‌ പറഞ്ഞു. കീഴടങ്ങിയ മുൻ മാവോയിസ്റ്റുകൾക്ക്‌ സർക്കാർ നൽകിയ സഹായവും ആദിവാസി മേഖലകളിലുണ്ടായ മാറ്റവും കണ്ടാണ്‌ മാവോയസ്റ്റുകൾ കീഴടങ്ങിയതെന്നും പൊലീസ് പറയുന്നു. ഈ വർഷം 224 മാവോയിസ്റ്റുകളാണ്‌ തെലങ്കാനയിൽ പൊലീസിന്‌ മുന്നിൽ കീഴടങ്ങിയത്‌.
പ്രവർത്തനരീതി ജീർണിച്ചതാണെന്ന്‌ മനസിലാക്കിയതിനാലും ആദിവാസി മേഖലകളിലുണ്ടായ പിന്തുണ നഷ്ടപ്പെട്ടതും കൊണ്ടാണ്‌ സപിഐ (മാവോയിസ്റ്റ്‌) അംഗങ്ങൾ കീഴടങ്ങിയതെന്നും പൊലീസ് പറഞ്ഞു. കുറച്ച്‌ ദിവസം മുൻപ്‌ മവോയിസ്റ്റുകൾ സ്ഥാപിച്ച ബോംബ്‌ പൊട്ടിത്തെറിച്ച്‌ ഒരു ആദിവാസി സ്ത്രീ മരിക്കുകയും ഒരാൾക്ക്‌ കാൽ നഷ്ടപ്പെടുകയും ചെയ്തിരുന്നു.
